كل ما تريد معرفتة عن المعموره

المعموره

             

 مكان فى الإسكندريه يعتبر جنه بالنسبه للشواطئ بتاعته او الهدوء اللى بيتميز بيه عن المعموره اتحدث

تجربتى مع المعموره هو انى اجرت شاليه هناك ٥ ايام (بتختلف اسعار الشاليهات على حسب تشطيب الشاليه بتبدى ب١٢٠٠ وبتوصل ل٢٠٠٠ فى اليوم وبيبقى شاليه محترم بيكفى اسره كبيره
وبالنسبه لدخول الشاطئ فهو بيبقى مجاناً طالما معاك الكارت اللى اجرت بيه الشاليه او الشقه وبالنبسه لموضوع القناديل فهو قليل جداً هناك لأن المعموره تعتبر زى لسان داخل لجوه على البحر يعنى انا طول الخمس ايام اللى كنت هناك فيهم مشوفتش غير قنديل واحد على الشط ومأذاش حد .

وفى هناك برضو شواطئ مميزه بيبقى رسم الدخول بتاعها غالى اوى بيوصل ل٨٥ جنيه للفرد  بيدققوا فى عدد الاطفال يعنى بيحسبلك طفلين او تلاته فى تذكره واحده ، فى برضو هناك مكان مميز جداً على الشاطئ تقدر تأجر منه jet ski ب ٢٥٠ جنيه للربع ساعه  وعنده برضو banana boat  ب٦٠ جنيه للفرد  وبيطلع معاك ناس محترفه ومعاهم كاميرا بروفيشينال يصوروك احلى صور انت وفى البحر ويسلام لو يبقى فى الخلفيه قصر المنتزه 

اما بالنسبه للخروجات باليل فبيبقى فى ممشى جميل على البحر وتقدر كمان تأجر من عليه عجل و بيتش باجى و سكوتر كهربا وحاجات كتير بتبقى ممتعه جداً وممكن برضو تدخل المنتزه.اللى هو احسن مكان فى إسكندريه . وتتفسح هناك على طول من المعموره
وفى برضو كافيهات ومطاعم كتير على البحر فى الممشى واسعارها كويسه، وملاهى كبيره جداً متقلش حاجه عن دريم بارك 

وفى برضو فى المعموره شارع كبير اسمه السوق فى كل حاجه حرفياً فول اسكندرانى - طعميه - محلات ملابس - چيلاتى  - محلات سمك - إلخ  وصيدليات شغاله ٢٤ ساعه
رسم دخول المعموره 20 جنيه للفرد او العربيه لو أنت مش معاك كارنيه التأجير، واوبر وكريم والتاكسى بيدخل لحد جوه من غير رسوم
المعموره بتبعد ٣٠ دقيقه عن محطه سيدى جابر اللى هى تعتبر قلب اسكندريه
وممكن فى اى لحظه تطلع من المعموره تروح اسكندريه تتفسح شويه او تجيب حاجه من هناك وتيجى فى اسرع وقت مش مسافه يعنى انا عن نفسى كنت بنزل اسكندريه كتير اروح ميامى اكل من چيلاتى لبنان  او اشترى حاجات من شارع خالد بن الوليد او اروح مول سان ستيڤانو اللى هو ميقلش حاجه عن المولات اللى فى القاهر بل انضف واحسن بكتير او اتمشى على كوبرى ستانلى
ونصيحه منى متتعاملش مع التاكسى كتير افضل حاجه هناك اوبر وكريم لأن حقيقى سواقين التاكسى بيبالغوا فى الأسعار .