كانت الإسكندرية في العصور القديمة عاصمة مصر وسميت "عروس البحر المتوسط"
وقد بناها الإسكندر الأكبر ، وسميت بذلك من بعده ، وتعد الإسكندرية ثاني أكبر مدن مصر بعد القاهرة.
سياحة الاسكندرية
سياحة الاسكندرية
وتتميز تلك المدينة بالعديد من المواقع ذات المناظر الخلابة والمعالم السياحية المميزة ؛
لذلك تعد صناعة السياحة في الإسكندرية من أهم الوجهات التي تستقطب عددًا كبيرًا من السائحين
من داخل مصر وخارجها
، فهي جوهرة مصر. آثار حديثة البناء ، تحتوي على العديد من متاحف الفرعون القديمة والمعالم الدينية
وأماكن الترفيه المختلفة ،
والعديد منها من أشهر الشواطئ العالمية التي يزورها السياح من جميع أنحاء العالم.
لكل اللي عايز يعرف احسن اماكن للفسح والاكل في اسكندرية
فأنا هختصرلكوا اسكندرية كلها ف البوست ده وهقولك لو جيت لازم تروح فين عشان تقضي اجازة ماتتنساش انا نزلت البوست ده قبل كده من مده طويلة وتم التعديل واضافة الاماكن اللي فتحت جديد في الاسكندرية
١- المعمورة : طبعا مينفعش حد يجي اسكندرية من غير مايروح المعمورة ويروح ملاهي المعمورة لانها حلوة ورخيصه جدا ،، غير ان المعمورة كبيرة ونضيفه وممكن البنات تروح تركب فيها عجل وتلف براحتها من غير ماحد يضايقها لان بيبقي في امن وظباط هناك كتير . سعر دخول المعمورة 20 جنيه وتذكرة الملاهي ب5 جنيه
٢- مكتبة اسكندرية : لازم اي حد يجي اسكندرية يدخلها ، صرح معماري عبقري وكبيرة جداا وجواها متاحف كتير زي متحف السادات ومتحف للاثار الفرعونية والقبطيه والاسلاميه وحجات تانيه كتير .. وهتلاقي جمبها القبة السماويه دي بتعمل عروض كأنك في الفضاء بالظبط ومن احلي الحجات اللي هتستمتع بيها في حياتك .. وتذكرة المكتبة ٤ جنيه .
٣- متحف المجوهرات : من الحجات اللي هتستمتع بيها جدااا فيه مجوهرات من كل ملوك مصر وفي مجوهرات جايه من بره .. ومكان نضيف جدا وهتستمتع بيه وتحقد فيه ع كمية الذهب والالماظ اللي فيه ، التذكرة ب ١٠ جنيه .
٤- كوبري استانلي : ملوش اي تلاتين لازمة غير انك لازم تروح تتصور عليه صورتين حلوين او تاكل عنده حلبسة ،،اوتقعد علي كافيه سلطنة استانلي غير كده هو كوبري عادي وزحمه ، طبعا ببلاش .
٥- قلعة قايتباي : أحلي مكان تعمل فيه فوتوسيشن من كتر ماهو كبير ،، هو عبارة عن اوض كتير اوووي وفاضيه ومن فوقيه بتقدر تشوف فيو حلو اوووي لاسكندرية من فوق ،،تذكرة القلعة ب ٣٠
و للطلبة ب ١٠ جنيه .ويفضل الصور تكون بالنهار
٦-جليم باي . او لسان جليم احلي واجمل قعده في وسط البحر هتلاقي كل اللي نفسك فيه علشان تم تجميع الكافيهات والمطاعم فيه واسعاره تناسب كتير من الناس
٦- ألبان سويسرا : في كامب شيزار شارع بورسعيد اللي يجي اسكندرية ومياكلش عند البان سويسرا يبقي مجاش اسكندرية ،، اي اكله هناك معموله بالجبنة ، والجبنة بتاعته خليط من ١٢ نوع جبنة ،، طعمه قليل الادب ولازم اي حد يجي يجربه .لانه عمل تعديلات جديده
٧- كبدة الفلاح : في محطة الرمل جنب سينما مترو مينفعش تكون ف اسكندرية ومتاكلش كبدة اسكندراني . وأصل الكبدة الاسكندراني هو كبدة الفلاح ،بتروح تاكل ١٥ نص رغيف كبدة وتلاقيك لسه جعان مثلا من كتر ماهي حلوة وبعدين جمبها تشرب من خروب امال
٨- حودة جندل : ناصية الشارع بتاع مستشفي السلامة الشلالات في الازاريطة وهو مطعم شعبي هتدفع 90 جنيه بس وهتاكل كل انواع السمك اللي هتتخيلها وتغوص في السمك ومش هنقدر تخلصه ،، سبب شهرته انه رخيص . لانه شعبي
٩- الشيخ وفيق : في بحري راس التين هتروح تطلب واحد رز بلبن بالمكسرات ب25 جنيه واتحداك تكون كلت واحد زيه قبل كده في حياتك .
ده غير سلسلة محلات ب لبن ايوه اسمه كده وده هتلاقية في اماكن كتير في اسكندرية الراعي الرسمي للحلو في مصر 
أحلى أرز بلبن و ام على بالقشطه و المكسرات و چيلاتي اسكندراني موجودين في بــ لبن وبس 
فروعه
( سموحه - العصافرة - خالد بن الوليد - محرم بك - محمد نجيب - مارينا ٤ - جليم باى - مطروح - البيطاش - بحري - اكتوبر الحصرى - فيصل - مصر الجديدة - وسط البلد - ستانلي )
١٠- سان ستفانو وجرين بلازا وكارفور ،، دول اشهر ٣ مولات لو حابين تعملوا شوبنج وكل واحد فيه فود كورت في كل المطاعم وجوا كل واحد فيه سينما لو حابين تتفرجوا علي الافلام الجديدة .
١١- محل البن البرازيلي : في محطة الرمل الناس اللي حابين القهوة يبقي لازم يجربوه لانه جواه مطحن وبتشم ريحه القهوة وانت بتشربها .
١٢- مطعم بلبع : في ستي اسكوير سيدي جابر احلي مشويات علي مدار ٢٤ ساعة شغاااااااااااال وعندو كمان سمك يعني مش حرمنكو من حاجة وفي اخر الشارع هتلاقي كوبري سيدي جابر يعني تيفولي دوم يعني اشهر الكافيهات والمطاعم
١٣- اما بقا لو غاوي كشري خش علي التحرير في خالد بن الوليد او وصايه او ع السخن في محطة الرمل
١٤- ولو انت من عشاق الفول والفلافل (الطعمية يعني ) عندك محمد احمد في محطة الرمل هتلاقي اكلات زمان عندة زي البصارة والشكشوكة الخ الخ لانة من اقدم المطاعم اللي في اسكندرية بس بقا غالي شويه
ده دليلك لإسكندرية .. اسكندرية احلي مكان في مصر وخصوصاً في الشتاء ، هتستمتع بيها وخصوصا لو الدنيا مطرت ، هتلاقيها مطرة ودفا في نفس الوقت
الناس فيها حلوين وبشوشين وهيساعدوك لو عرفوا انك غريب ، بس اهم حاجه اعرف ان ميكروباص يعني " مشروع " يعني لو سألت حد عن مكان وقالك اركب مشروع من هنا متستغربش
وعاندي كمان اماكن كتيير ممكن اوديكم فيهااا بس خلصو دوول الاول .....بزمتكم مش البوست ده يستاهل لايـــــك
يلا جهز شنطتك واعمل منشن لصحابك ويلا علي اسكندرية ، اسكندرية في الشتا متتعوضش 